Teuta është tri ndeshje larg titullit ‘kampion’ dhe në Durrës entuziazmi është i madh në vigjilje të ndeshjes me Partizanin.
Trajneri Edi Martini në konferencën për shtyp deklaroi se Teuta do të kërkojë të marrë maksimumin në këtë ndeshje, edhe pse luan për dy rezultate.
FINALJA ME PARTIZANIN – “Po, e vërtetë, ndaj Partizanit është ndeshja më e rëndësishme e karrierës sime si trajner. Jemi në një pikë që ne duhet të bëjmë çmos që ta mbyllim kampionatin që këtë javë, sepse është një ndeshje shumë e rëndësishme.
MBROJTJA MË E MIRË KUNDËR SULMIT MË TË MIRË – “Unë them që jemi ekipi më i mirë. Jo, nuk do të luajmë në mbrojtje. Ne do të kërkojmë të bëjmë lojën tonë, pavarësisht se një pikë mund të jetë e kënaqshme, por ne do të kërkojmë të fitojmë ndeshjen. Shpresojmë, po bëjmë stërvitje mjaft mirë.”.
STRATEGJIA KUNDËR PARTIZANIT – “Djemtë mezi e presin këtë ndeshje, kështu që është një ndeshje që duhet ta fitojmë patjetër. Ne jemi në krye dhe normalisht që na presin ndeshje të rëndësishme dhe delikate. Janë ndeshje për t’u fituar, jo për të luajtur futboll të bukur”.
ME PARTIZANIN LUANI PËR DY REZULTATET – “Do të kërkojmë nga sekondi i parë e deri në fund për të fituar ndeshjen. Partizani është në presion më tepër, ata duhet të fitojnë me patjetër. Ne luajmë për dy rezultate, ne jemi më të uritur për ta marrë këtë kampionat. Nga fillimi e deri në këtë moment që flasim, ne kemi derdhur shumë djersë dhe kemi bërë shumë sakrifica. Mendoj se ky qytet e meriton një titull në këto momente“. /KFTEUTA/
Leave us a reply